နိဒါန်း

၁၉ ၉ ၉ မှ ၂၀၀၇ ခုနှစ်အထိ Digital Video Editing သင်တန်းတွင်

ဟောပြောပို့ချခဲ့သော သင်ခန်းစာများမှ ကောက်နှုတ်ချက်များ

ပို့ချသူ - ကိုဝဏ္ဏကျော်

ကျွန်တော်တို့ ဒီသင်တန်းရဲ့အမည်ကို Post Production လို့အမည်တပ်ပါတယ်။ ဒါပေမယ့် ရန်ကုန်မှာ လူသိများတာ Special Effect သင်တန်းလို့ လူသိများပါတယ်။ ဘာ့ကြောင့်လဲဆိုတော့ ဗီဒီယိုတွေထဲမှာ ကွန်ပျူတာအကူအညီနဲ့ Editing လုပ်မယ်၊ အထူးပြုလုပ်ချက်တွေ ထည့်သွင်းမယ်ဆိုတဲ့ ကိစ္စရပ်တွေကို ရန်ကုန်က လောကသား တော်တော်များများနဲ့ ပြည်သူလူထု တော်တော် များများက Special Effect လုပ်ငန်းစဉ်တွေလို့ပဲ လွန်ခဲ့တဲ့ ငါးနှစ်ခြောက်နှစ် လောက်ကတည်းက မှတ်ယူလာခဲ့တာပါ။ ဘာလို့ Post Production လို့ ခေါ်ရသလဲဆိုတော့ ရုပ်ရှင်၊ ဗီဒီယိုထုတ်လုပ်ရေးတစ်ခုမှာ အဆင့်ဆင့်ရှိပါတယ်။ Pre Production ရယ်၊ Post Production ရယ်ဆိုပြီးတော့ အဆင့်ဆင့်ရှိပါတယ်။ Production ဆိုတာကို ကျွန်တော်တို့က ထုတ်လုပ်ရေးလို့ မြန်မာလိုအဓိပ္ပါယ်ပြန်ကြပေမယ့် Producer ဆိုတဲ့အသုံးအနှုန်းကိုတော့ ထုတ်လုပ်ရေးမှူးလို့ အဓိပ္ပါယ်ပြန်ရပါမယ်။ ရန်ကုန်မှာတော့ Producer ကို ငွေအရင်းအနှီးစိုက်ထုတ်သူလို့ မှတ်ယူကြပါမယ်။ ဒီထုတ်လုပ်ရေးမှူးဆိုတဲ့စကားလုံးကို ကျွန်တော်တို့ မြန်မာနိုင်ငံရဲ့ အသံလွှင့်ဌာနတွေဖြစ်တဲ့ မြဝတီ၊ မြန်မာ့အသံတွေမှာအများဆုံးတွေ့ရပါတယ်။ Producer တွေဟာအများအားဖြင့် အမျိုးသမီးတွေ ဖြစ်နေတာကို တွေ့ရပါတယ်။ Producer တစ်ယောက်ရဲ့အလုပ် ဟာဘာလဲဆိုတော့ ဒီရုပ်ရှင်ဗီဒီယိုထုတ်လုပ်ရေး တစ်ခုလုံးအတွက် သူဟာ တာဝန်ယူပြီးတော့ လုပ်ကိုင် ရတဲ့ သူမျိုးဖြစ်ပါတယ်။ သူဟာ ဇာတ်ညွှန်းနဲ့ ရိုက်ညွှန်းရေးသားတဲ့နေရာ၊ ရိုက်ကူးတဲ့နေရာ၊ တည်းဖြတ်ပြီး တော့အချောသတ် မီဒီယာတွေထုတ်လုပ်တဲ့နေရာအထိ အားလုံးကို နားလည်နေမှ သူဟာ Producer တစ်ယောက်ရဲ့အရည်အချင်းနဲ့ ပြည့်စုံတယ်လို့ ဆိုကြပါတယ်။

အဲဒီတော့ Pre-production ဆိုတဲ့အပိုင်းကဏ္ဍမှာ ဘာတွေပါမလဲဆိုတော့ ကြည့်လိုက်ကြရအောင်။ ဇာတ်လမ်းတစ်ခု ဆိုကြပါစို့၊ သူ့ရဲ့ရင်းမြစ်ဟာဘယ်ကစသလဲဆိုတော့ (story) ဆိုတဲ့ဝတ္ထုကနေစပါတယ်။ အဲဒီဝတ္ထုဟာစာပေနဲ့ရေးသားထားတဲ့၊ စာရွက်ပေါ်မှာ ရေးသားထားတဲ့ ဇာတ်လမ်းတစ်ခုဖြစ်တဲ့အတွက် ကြောင့်မို့လို့ အဲဒီဝတ္ထုအတိုင်းကို ကျွန်တော်တို့ဟာ ရုပ်ရှင်ဗီဒီယိုရိုက်ကူးလို့ မရပါဘူး။ အဲဒီတော့ ကျွန်တော်တို့ဟာ ပထမဆုံး Synopsis လို့ခေါ်တဲ့ ဇာတ်လမ်းအကျဉ်းတစ်ခု ကျွန်တော်တို့ထုတ်ရပါ တယ်။ အဲဒီဇာတ်လမ်းအကျဉ်းပေါ်မှာ မူတည်ပြီးတော့ Scene Serial လို့ခေါ်တဲ့ ဒီဇာတ်လမ်းတစ်ခုပေါ်မှာ Scene ဆိုတဲ့ အခန်းပေါင်း ဘယ်လောက်ပါမလဲဆိုတာကို အရင်ဆုံးဆွဲချပစ်ရပါတယ်။ Scene Serial မှာ ပုံစံအားဖြင့် အခန်း (၁) ဟာ နေ့လား၊ ညလား၊ Indoor လား၊ Outdoor လားဆိုတဲ့ အတွင်းအပြင်တွေကို အရင်ခွဲရပါတယ်။ ပါဝင်တဲ့ဇာတ်ကောင်တွေရယ်၊ အခန်း (၁) ရဲ့အသေးစိတ်အကြောင်းအရာလေးတွေကို ချရေးရပါတယ်။ Scene Serial အားဖြင့် ဇာတ်လမ်းတစ်ခုဟာ Scene ၅၀၊ ၆၀ လောက် ပါဝင်နေတယ်ဆို တာတွေ့ရပါတယ်။

Scene Serial ရပြီဆိုလို့ရှိရင် ဒီ Scene Serial နဲ့ ဇာတ်လမ်းအကျဉ်းပေါ်မှာ မူတည်ပြီးတော့ ဝတ္ထုကျောရိုးရဲ့ ပါဝင်နေတဲ့ အကြောင်းအရာတွေ မပျက်စီးစေပဲ ဇာတ်ညွှန်းလို့ဆိုတဲ့စာရွက်ပေါ်မှာ ဇာတ်လမ်းတစ်ခုကို မြင်သာထင်သာအောင် ရိုက်ကူးပြတဲ့ အနေအထားမျိုးအထိကို ဇာတ်ညွှန်းဆရာတွေ က ရေးဆွဲကြတာဖြစ်ပါတယ်။ ဒါပေမယ့် အဲဒီဇာတ်ညွှန်းဟာ ရိုက်ကူးထုတ်လုပ်ရေးမှာ ပါဝင်နေပေမယ့် ပညာရှင်အားလုံး နားလည်နိုင်လောက်တဲ့ အနေအထားထိတော့ မဟုတ်ပါဘူး။ ဒီဇာတ်ညွှန်းကိုကြည့်ခြင်း အားဖြင့်တော့ ရုပ်ရှင်တစ်ခုဟာ ရိုက်ကူးပြီးစီးသွားတဲ့အချိန်အထိ ဘယ်လိုအနေအထားမျိုးနဲ့ထွက်ပေါ်လာ မလဲဆိုတာ ဇာတ်ညွှန်းကိုကြည့်ပြီး သိနိုင်ပါတယ်။ အဲဒီဇာတ်ညွှန်းဟာ ရုပ်ရှင်ရိုက်ကူးဖို့အတွက် အရေးကြီး ဆုံးသောအပိုင်းမှာ ပါဝင်ပါတယ်။ ဇာတ်ညွှန်းဆရာများဟာ အများအားဖြင့် ဝတ္ထုရဲ့ ဇာတ်လမ်းကျောရိုးအ နေအထားတွေရယ်၊ ဝတ္ထုတစ်ခုရဲ့ တည်ဆောက်ပုံတွေရယ် ပြီးတော့ ရုပ်ရှင်သဘောတရားတွေရယ် အားလုံးကို နားလည်တတ်ကျွမ်းတဲ့လူမျိုးတွေ ဇာတ်ညွန်းကိုရေးသားကြတာ များပါတယ်။ ဇာတ်ညွှန်းရရှိပြီ ဆိုရင်တော့ ကျွန်တော်တို့ဟာ ရိုက်ကူးထုတ်လုပ်မယ့် ပညာရှင်အားလုံးသိသာအောင် ရိုက်ညွှန်းဆိုတဲ့ဟာ တစ်ခုထပ်ပြီးတော့ရေးရပါတယ်။

ဇာတ်ညွှန်းကိုတော့ အင်္ဂလိပ်လို Script လို့ခေါ်ပြီးတော့ ရိုက်ညွှန်းကိုတော့ Storyboard လို့ခေါ် ပါတယ်။ ကျွန်တော်တို့ဆီမှာတော့ Storyboard ကို ရုပ်မြင်ကြော်ငြာတွေ ရိုက်ကူးတဲ့နေရာမှာပဲ သုံးတာတွေ့ရပါတယ်။ Storyboard ကတော့ ပိုပြီးအသေးစိတ်ကျပါတယ်။ Storyboard မှာဆိုရင် Visual လို့ခေါ်တဲ့ Cut by Cut ပုံတွေရယ်၊ သူ့ရဲ့ Cropping တွေ၊ သူ့ရဲ့ဇာတ်ကောင်တွေရဲ့ လှုပ်ရှားမှုတွေ၊ Camera Movement တွေအားလုံးကို ပညာရှင်တွေနားလည်နိုင်လောက်တဲ့ အသုံးအနှုန်း တွေနဲ့ ရေးသားထားပါတယ်။ Camera Frame ဘယ်လိုချမလဲ၊ ဇာတ်ကောင်က ဘယ်နေရာမှာနေမလဲ၊ Camera Movement ကဘယ်လိုယူမလဲ၊ ဒီဇာတ်ကောင်ဟာ ဘယ်ကနေဘယ်လို လှုပ်ရှားသွားမယ် ဆိုတာကို ပုံလေးတွေဆွဲရပါတယ်။ အဲဒီ Story Board ပေါ်မှာပုံဆွဲတဲ့ Story Board Artist ဆိုတဲ့ ကာတွန်းဆရာဟာ သက်သက်ရှိပါတယ်။ ကျွန်တော်တို့ဆီမှာတော့ အဲဒီလိုခွဲထားတာ မတွေ့ရပါဘူး။ ကာတွန်းဆရာတွေ၊ ပန်းချီဆရာတွေဟာ ရုပ်ရှင်သဘောထား နားလည်တယ်ဆိုရင် Storyboard Artist အဖြစ် ရပ်တည်လို့ရပါတယ်။ အဲဒီ Visual မှာပါတဲ့ အသေးစိတ်အကြောင်းအရာတွေကို ကျွန်တော်တို့ ဟာ Animation သို့မဟုတ် Description လိ်ု့ခေါ်တဲ့ အသေးစိတ် အချက်အလက်အားဖြင့် စာနဲ့ပြန်ရေးရပါတယ်။ ပြီးရင် Props လို့ခေါ်တဲ့ အဲဒီရိုက်ညွှန်းရဲ့ အခန်းစဉ်နဲ့ Cut by Cut မှာပါမယ့် ခန်းဝင်ပစ္စည်းတွေ ရယ် သူ့ရဲ့ပါဝင်မယ့် Setting အခန်းအနားတွေကို ဘယ်လိုပြင်ဆင်ထားရမယ် ဆိုတာတွေကို ဘေးမှာ Props ဆိုပြီး ကဏ္ဍတစ်ခု ပါပါတယ်။ အဲဒီလိုအားဖြင့် ကျွန်တော်တို့ဟာ ရိုက်ညွှန်းတစ်ခုကို တည်ဆောက်ဖန်တီးကြပါတယ်။

ကျွန်တော့အတွေ့အကြုံအရ သုံးဆယ်စက္ကန့်စာ ကြော်ငြာတစ်ခုအတွက် Storyboard ဟာ အနည်းဆုံး ဆယ်ကွက်ကနေ အကွက်နှစ်ဆယ်လောက်အထိ ရေးကြတာတွေ့ရပါတယ်။ သူတို့ဆီမှာ တော့ ဇာတ်ကားကြီးတစ်ခုလုံးအတွက် Story Board ကိုအရင် ထုတ်ပါတယ်။ ပြီးတော့မှ အဲဒီ Story Board အတိုင်း အတိအကျရအောင် ရိုက်ကြပါတယ်။ အဲဒီ Story Board ကိုကြည့်လိုက်တာနဲ့ အဲဒီရုပ်ရှင် ဇာတ်ကားကြီးကို စာရွက်ပေါ်မှာ ရိုက်ပြီးသာဖြစ်တယ်ဆိုတာ အားလုံးက နားလည်ကြပါတယ်။ ပြီးတော့ အဲဒီ Story Board ကို ရင်းနှီးမြှုပ်နှံတဲ့သူရယ်၊ Director ရယ်၊ Camera Man ရယ်၊ မင်းသား မင်းသမီးတွေ ရယ် အကုန်လုံးဟာ reference လုပ်ပြီးတော့ သူတို့ဒီနေရာမှာ ဘာလုပ်ရမယ်၊ ဒီနေရာမှာ ဘယ်လိုသရုပ် ဆောင်ရမယ်၊ ဒီနေရာတွေကို ဘယ်လိုရိုက်ကူးရမယ်ဆိုတာတွေကို မှီငြမ်းကိုးကားပြီးတော့ ဖြည့်စွက်စရာ ရှိရင်လည်း ထပ်မံပေါင်းထည့်မယ်။ သူတို့လုပ်လို့ မရတာရှိရင်လဲ လုပ်လို့မရတဲ့အကြောင်းကို Director နဲ့ အငြင်းပွားမယ်။ အဲဒီလိုအားဖြင့် ကျွန်တော်တို့ဟာ Story Board တစ်ခုကို ဖန်တီးတာဖြစ်ပါတယ်။ Synopsis လို့ခေါ်တဲ့ ဇာတ်လမ်းအကျဉ်းရယ်၊ Script လို့ခေါ်တဲ့ ဇာတ်ညွှန်းရယ်၊ Story Board တစ်ခုရယ်ရပြီဆိုရင် ကျွန်တော်တို့ဟာ ရိုက်ကူးထုတ်လုပ်မှု လုပ်ငန်းစဉ်ကို သွားလို့ရပါပြီ။

ရုပ်ရှင်တစ်ကားကို ရိုက်ကူးထုတ်လုပ်တဲ့ လုပ်ငန်းစဉ်တွေအားလုံး လုပ်ကြပြီဆိုလို့ရှိရင် ခုနက စာရွက်ပေါ်မှာ ရိုက်ကူးထားခဲ့တဲ့ အချက်အလက်တွေရယ်၊ ဘယ်နေရာမှာရိုက်မယ်၊ ဘာတွေ ဝတ်စားမယ်၊ ဘယ် Camera ကို ငှားမယ်၊ Transportation ကို ဘယ်လိုလုပ်မယ်ဆိုတဲ့ အသေးစိတ်အကြောင်းအရာ တွေကိုတော့ ရိုက်ကွင်းမန်နေဂျာတွေက စီစဉ်ပြီးတော့ ထုတ်လုပ်မှု လုပ်ငန်းစဉ်တွေကို လုပ်ကြပါတယ်။ ဘာကြောင့် Pre Production ကိုလုပ်ကြလဲဆိုလို့ရှိရင် ရိုက်ကူးထုတ်လုပ်မှု ကုန်ကျစရိတ်ဟာ သိပ်ကိုကြီး ပါတယ်။ ရိုက်ကွင်းတစ်နေ့စာ ကုန်ကျစရိတ်ဟာ တော်တော်လေးကို တန်ဖိုးကြီးမားပါတယ်။ ရိုက်ကွင်းပေါ်ရောက်ပြီဆိုတော့မှ ကိုယ်က ဘာရိုက်ရမလဲ၊ ဘယ်လိုသရုပ်ဆောင်ရမလဲ၊ ဒီအခန်းမှာ ဘာတွေပါမလဲဆိုတာ ကြိုပြီးတော့ မသိခဲ့ဘူးဆိုရင် ဒီရိုက်ကွင်းစရိတ်တွေဟာ အဆမတန်ကြီးထွားသွားမှာ ဖြစ်ပါတယ်။ အဲဒီပြဿနာကို ကြိုတင်ဖြေရှင်းတဲ့အနေနဲ့ စာရွက်ပေါ်မှာ Pre Production လုပ်ငန်းကို လုပ်ကြရတာဖြစ်ပါတယ်။ ရိုက်ကူးကြပြီ။ ရိုက်ကူးထုတ်လုပ်တဲ့နေရာမှာ ရိုက်ကွင်းပေါ်မှာ ပညာရှင်တွေ ထပ်ပြီးပါလာပါတယ်။ မှတ်တမ်းပညာရှင်တွေ၊ Camera Man တွေ၊ Lighting Technician အလင်းပညာရှင်တွေက အစ အနိမ့်စားပညာရှင်တွေဖြစ်တဲ့ Gaffer တို့ Best Boy တို့ ရိုက်ကွင်းပေါ်မှာ ထပ်ပြီးတော့ ပါရပါတယ်။ Director ကနေ သူ့စိတ်ကြိုက်ရိုက်ကူးထုတ်လုပ်လိုက်တဲ့၊ နေ့စဉ်နဲ့အမျှတိုး တက်ဖြစ်ပေါ်နေတဲ့ ရိုက်ကွင်းအခြေအနေအားလုံးကို မှတ်တမ်းသမားကနေ တာဝန်ယူပြီးတော့ မှတ်သား ရပါတယ်။ သူဟာ စာအုပ်တစ်အုပ်ကိုင်ပြီး ဒီနေ့ ဘာရိုက်တယ်။ ဘယ်သူလာတယ်၊ ဘယ် scene ကိုရိုက် တယ်၊ ဘယ် Location မှာဖြစ်တယ်၊ ဘာအဝတ် ဝတ်ထားတယ်၊ ဘာစကားပြောတယ်၊ Camera ထဲမှာ ထည့်ထားတဲ့ အခွေက အခွေနံပါတ် ဘယ်လောက်ဖြစ်တယ်။ အဲဒီအခွေနံပါတ်ရဲ့ ဘယ်နေရာမှာ ဘာရှိ တယ် ဆိုတာကအစ မှတ်တမ်းသမားက ရေးသားရပါတယ်။ ဒီမှတ်တမ်းသမားရေးသားထားရခြင်းဟာ နောက်တဆင့်မှာလာမယ့် ကျွန်တော်တို့အပိုင်းဖြစ်တဲ့ Post Production သမားတွေ အလုပ်လုပ်ရတာ လွယ်ကူအောင် မှတ်သားရခြင်းဖြစ်ပါတယ်။ မှတ်တမ်းသမားဟာ Continuity ကိုပါ မှတ်ရပါမယ်။ Continuity လွဲနေရင် Editing မှာ Jump ဖြစ်ပါတယ်။

Production မှာလုပ် လာခဲ့တဲ့ Quality ကို မကျသွားအောင် Pre-Production မှာ စတင်ရေးဆွဲ လာခဲ့တဲ့ ဇာတ်ညွှန်းနဲ့ ရိုက်ညွှန်းရဲ့အရသာကို ပျက်မသွားအောင် Post Production သမားတွေမှာ အများ ကြီးတာဝန်ရှိပါတယ်။ ရိုက်ကူးထုတ်လုပ်လို့ ပြီးစီးသွားတဲ့အချိန်မှာ Raw အခွေ၊ ဖလင်ဆိုရင်လဲ ဖလင်အ လိပ်ပေါင်းများစွာ အကြမ်းဖလင်တွေအများကြီး ရရှိပါတယ်။ ဒီအကြမ်းဖလင်တွေနဲ့ ကျွန်တော်တို့ ခုနတုန်းက မှတ်တမ်းသမားမှတ်သားထားတဲ့ အချက်အလက်တွေနဲ့ပေါင်းပြီးတော့မှ Post Production သမားတွေဆီကို ရောက်လာကြတာဖြစ်ပါတယ်။ Editor ရဲ့လက်ထဲမှာ မှတ်တမ်းတွေရောက်လာပြီဆိုရင် တည်းဖြတ်သူတွေက ဘယ်ကတ်ကိုယူမယ်၊ ဘယ်Scene ထဲက Take လို့ခေါ်တဲ့ အထပ်ထပ်အခါခါ ပြန်ရိုက်တဲ့အခါမှာ တကယ်အသုံးပြုမယ့်အပိုင်းလေးကို ဘယ်အချိုးမှာစပြီးတော့ ယူမယ်ဆိုတဲ့ဟာတွေကို ကြည့်ပြီးတော့မှ Post Production သမားတွေက အလုပ်လုပ်ကြရတာဖြစ်ပါတယ်။

ဥပမာအားဖြင့် ကျွန်တော်တို့ဟာ ခွေနံပါတ် (၁) ထည့်လိုက်မယ်၊ ပထမဆုံးဟာ Scene နံပါတ် (၁၆) ဖြစ်မယ်၊ အဲဒီ Scene နံပါတ် ၁၆ ထဲက ပထမဆုံးယူတဲ့ကတ်ဟာ အထပ်ထပ်အခါခါပြန်ရိုက်ခဲ့ရ တယ် (သို့) ၅ ခါပြန်ရိုက်ရတဲ့အခါမှာ Take ၅ ဆိုပြီး အကြိမ်ရေ ၅ကိုယူမယ်ဆိုရင် အဲဒီဟာ Final Decision မှတ်သားထားမှာဖြစ်ပါတယ်။ အဲဒါကို Post Production သမားတွေက အဆင်သင့် Director တွေ ကားဆက်လို့ရအောင်လို့ ကျွန်တော်တို့တွေ သိမ်းဆည်းထားရပါတယ်။ ဒါဟာ Post Production သမားတစ်ယောက်မှာ အလိုလိုနားလည်ထားရမယ့် အချက်တွေဖြစ်ပါတယ်။ Post Production သမားလို့ ခေါ်တဲ့ Editing သမားတစ်ယောက်ဟာ ဘာတွေအရည်အချင်းလိုအပ်သလဲလို့ တွေးကြည့်ရင် သူဟာ Pre-Production တွေရဲ့ အကြောင်းကိုတော့ နားလည်ရမယ်။ Camera အခေါ်အဝေါ်တွေ၊ Camera Movement တွေရဲ့ အခေါ်အဝေါ်တွေကို သူနားလည်ရမယ်။ ပြီးရင် ကတ်တစ်ခုနဲ့တစ်ခုကို ဘယ်လို ပြောင်းလို့ရတယ်ဆိုတဲ့ Edit Theory ကိုလည်း နားလည်ရပါမယ်။ ဒါတွေဟာ Post Production သမားတစ်ယောက်မှာ လိုအပ်တဲ့အရည်အချင်းတွေအားလုံးဟာ သူ့ရဲ့ အသက်မွေးဝမ်းကြောင်းအတွက် ကို နဂိုကတည်းကရှိနေရမယ့် အရည်အချင်းတွေ ဖြစ်ပါတယ်။

အဲဒီတော့ Director လာပြီ၊ မှတ်တမ်းလာပြီ၊ အခွေကြမ်းလာပြီ၊ အဲဒီထဲကနေ အရုပ်တွေကောက် ကြတယ်။ အခွေကြမ်းထဲက လိုချင်တဲ့အပိုင်းတွေကို ဖြတ်ယူကြတယ်။ Director ရဲ့ညွှန်ကြားမှုနဲ့ ကျွန်တော်တို့ ကားဆက်တယ်။ အရင်တုန်းကတော့ Analog Editing လို့ခေါ်တဲ့ Computer ကိုအခြေခံမ ထားတဲ့ Electronic Base Editing တွေနဲ့လုပ်ကြတယ်။ အခု ကျွန်တော်တို့သင်ကြားမယ့် အပိုင်းကတော့ Digital Editing လို့ခေါ်တဲ့ Computer ကိုအခြေခံထားတဲ့ Editing ပဲဖြစ်ပါတယ်။ ကျွန်တော်တို့ဟာ တာဝန်တစ်ခု ထပ်ပိုလာပါပြီ။ Computer ကိုသုံးစွဲတတ်ဖို့ လိုအပ်လာပါပြီ။ Computer နဲ့ကိုင်တွယ်ပြီး တော့ အလုပ်လုပ်ရတဲ့လူတွေမှာ အခြေခံအားဖြင့် Computer ကို Hardware Knowledge, Software Knowledge တွေရှိထားဖို့ လိုပါတယ်။ ပြီးတော့မှ သူတို့ဟာ Editing Software တွေရဲ့ Tool တွေကို သိဖို့လိုအပ်ပါတယ်။ ဒါ့ပြင် အရုပ်တင်မက အသံပိုင်းဆိုင်ရာမှာပါ အခြေခံဗဟုသုတတွေရှိဖို့ လိုအပ်ပါ တယ်။ အဲဒီတော့ Post Production သမားတစ်ယောက်ရဲ့အလုပ်ဟာ နောက်ဆုံးရုံတင်ပြသလို့ရတဲ့အထိ၊ အခွေချောထုတ်ဖို့အထိ အဆင့်အားလုံးကို သူသိရမှာဖြစ်ပါတယ်။ ဒါကြောင့်မို့ ဒီ Course ထဲမှာ Editing တည်းဖြတ်ခြင်းပညာ၊ 2D Animation နှစ်ဘက်မြင် လှုပ်ရှားမှုတွေပြုလုပ်တဲ့ပညာ၊ 3D Animation သုံးဘက်မြင် လှုပ်ရှားမှုတွေပြုလုပ်တဲ့ပညာ၊ Call Animation တွေ ဘယ်လိုပြုလုပ်သလဲ၊ Compression Theory နောက်ဆုံး အချောခွေထုတ်တဲ့အခါမှာ Computer နဲ့ အခြေခံပြီးလုပ်ကြတဲ့အတွက် Export Media မှာ VCD ခေါ်တဲ့ VCD အချပ်တွေ၊ DVD အချပ်တွေထုတ်ကြမယ်ဆိုရင် အဲဒီ VCD, DVD အချပ် တွေကို ဘယ်လိုရေးသားသလဲဆိုတဲ့ဟာတွေ၊ Professional ဖြစ်တဲ့ Drive and Format တွေ ဒါတွေအား လုံးကိုလည်း ကျွန်တော်တို့ သင်ကြားဖို့ ရည်ရွယ်ထားပါတယ်။